雙紅會今晚爆發，大戰前夕《每日郵報》搵嚟前曼聯隊長尼曼查維迪專訪，呢位塞爾維亞鐵衞喺紅魔生涯鬥利物浦曾經四次拎紅牌，係英超歷來鬥紅軍拎紅牌最多嘅球員，而佢講番往事都仲幾自豪，而且佢話每次輸俾利物浦後，前領隊費格遜都會特別嬲。

兩年前維迪已經講過，佢06年1月去紅魔前，其實紅軍搵佢先，今次佢回帶話：「紅軍搵我時我哋喺車入面傾，我老婆幫手翻譯，我當時唔識英文有啲擔心，不過我冇拒絕紅軍，兩日後曼聯嚟搵我，然後火速安排好所有交易事宜，所以我就咁去咗曼聯。」

而佢之後英超對利物浦曾經4次領紅，最經典梗係09年3月，曼聯主場1:4慘敗俾紅軍，維迪先解圍失誤俾費蘭度托利斯單刀射成1:1，然後再領紅牌兼輸罰球，由奧利里奧射成3:1，佢話當年費格遜嬲足24小時：「每次對利物浦都係苦戰，我仲好記得，嗰場波嘅第2日，領隊塊面仲嬲到紅晒，不過佢5分鐘後回復正常有講有笑，因為佢知要幫球隊重建信心。」

而維迪都話而家雙紅會仲係英超最大嘅打吡：「睇吓曼聯同利物浦嘅獎盃櫃，冇人會唔尊重，曼城近年好努力，不過呢場波仍然係英格蘭最大嘅波。」

-------------------
永不獨行！利物浦 FC 當季球星降臨《BFB》！立即帶領紅軍，創造新輝煌！ http://bit.ly/2oQObi1