電影節與商業影院同步登場的《PTU》，是杜琪峯拍過最好睇的麻甩佬傑作。雖然前作《鎗火》全男班，更麻甩，《PTU》還有兩個女角做綠葉，但整體張力落在幾個男演員身上，贏晒風頭。女角唔係惡屎騰雞的重案組Madam就是表情都唔多個的機動部隊男人婆女警。領導風流的，是有情有義，下屬心甘命抵追隨的PTU警官展Sir。展Sir無條件幫拖的，是輪輪盡盡的便衣警員肥沙。盧海鵬客串飾演江湖叔父，薑是老的辣，搶鏡到爆燈。老中青組別的麻甩佬，共冶一爐，心有靈犀，瞓身鬥演功架，非常惹味。跟《無間道》西裝筆挺的黑白道靚仔不同，杜琪峯讓演員散發佬味，舒舒服服的麻甩，似乎有意讓自歎倒楣的怨鬱中年，有機會吐口悶氣，來個小翻身。

同樣是麻甩騷，在藝術中心麥高利小劇場只演一場的CAN（N）ON，由龔志成夥拍李鎮洲和松島誠，音樂舞場聲控三人聯手包辦，是近期最抵睇的男人作品。三人又爬牆又奔跑，忽然歌舞忽然鬥嗌，又各自讀中、日兩個譯本的《瘟疫》。民間SARS狀態，男人唔係個個都似老董，硬銷穩定壓倒一切扮洗街。男人老狗點樣釋放中年抑鬱？一整夜頻撲搵番支失槍，算係有細藝。其他抗消沉方法，有待麻甩的你自己發掘。