自由黨主席田北俊○三年上京同領導人摸底後，懸崖勒馬反對23條，成為人民英雄，不過有土共就話佢誤傳聖旨，令23條立法功敗垂成。田少屬上海幫，以前老江在位，後台夠硬自然唔怕土共暗箭，但今時唔同往日，新領導人上台後形勢大變，八方翻查議員申領開支紀錄，發現田少今年四月就花咗八十蚊買咗本丁望著嘅《胡錦濤與共青團接班群──選拔接班人政策和中央團系精英》，相信係要惡補新領導人底細，減少見面時講錯說話機會。

梁家傑買演詞精選

根據介紹，呢本書主要分析所謂共青團代表人物背景，並列出中央團系、地方團系副省長以上高幹名錄共一百七十二人簡介，算係認識中國政府中、上層人物嘅工具書。
另一議員45條關注組梁家傑就使咗一百七十六蚊，買咗本名人演詞精選《ThePenguinBookofTwentiethCenturySpeeches》，梁大狀買呢本書，唔知係咪用嚟預備寫演詞時拋吓書包？
立法會開埋今日會就收爐，噚日一眾議員喺走廊大講暑假遊樂行程：張文光話今年要睇超額教師問題搞唔搞得掂先決定有冇得去旅行；周梁就話啲女大晒唔會跟佢去，講得興起，林健鋒忽然好熱情咁搭住周梁膊頭，話不如自由黨組團去雪山滑雪喎。
最冇癮當然係黃定光，佢今日會去見醫生，睇吓班大國手最後建議點醫佢個睡眠窒息症，佢話上次去港大做實驗，搞到成頭都係電線，實驗結果發現佢一個鐘頭窒息三十次，都咪話唔嚴重，呢個暑假佢都係專心治病，冇得去玩喇。

議員買乜書？
議員：田北俊

書名：《胡錦濤與共青團接班群──選拔接班人政策和中央團系精英》
作者：丁望
出版社：當代名家出版社
售價：$80

議員：梁家傑

書名：《ThePenguinBookofTwentiethCenturySpeeches》
編者：BrianMacArthur
出版社：Penguin
售價：$176

傳真︰2623-9278
電郵︰[email protected]