兩個字:難搞!投資者呢刻唔點揸貨繼續避戰,其實冇話錯,但就要決心唔理波幅,切忌忍唔住手追貨。進取參戰嘅話,就要先做好防守再諗進攻,務求喺個市可能回復穩步上揚嘅情況下,可以搵到着數,同時又有機會避過可能出現嘅洗倉潮,所以就要先諗如何避過地雷,然後先諗點樣搵着數。
今日先提供地雷股畀大家趨吉避凶。地雷股之一:成交活躍熱門股。𠵱家市場上出現唔同嘅賭局,唔係濠賭股而係一批快上快落、左右買賣盤活躍嘅熱門股,呢類股引嚟一大批投資者參與,只要儲齊一批散戶就有機會震倉,上述安東油田、金地商置睇怕都係呢類股份。
地雷股之二:國策受災及受惠股。國策受災股唔應該買就唔使多講,至於國策受惠股又點解?原因係前排好炒嘅國策概念,例如新能源、環保、嬰孩產品股,唔少股份基本因素未必理想,所謂受惠國策好可能係十劃未有一撇,揸呢一批股,風險亦比較高。
地雷股之三:本地資產股。日圓量寬、美元走強,港元資產開始冇咁有吸引力,買股口味隨時寧願冇磚頭好過有磚頭,所以揸重磚頭嘅股,最好避埋佢。
晉佳
本欄逢周一、三及五刊出