前自由黨李梓敬「過底」參加新民黨初選引起政壇熱議。究竟上屆立法會選舉時狠批容海恩係「西環契女」、聲稱自己唔會接受有關部門支配或祝福嘅李梓敬，點樣搖身一變成為「新一代西環契仔」？外間眾說紛紜，八方打聽下發現，李梓敬能夠華麗轉身或者同兩個同樣獲西環支持嘅立法會議員有關。

話說兩年前，李梓敬開始入讀城大法律博士課程，成為現任議員鼠王芬嘅高徒，唔使八方多講，大家都知鼠王芬係2008年首批西環契女，喺中聯辦撐腰下突然冒起贏出當時嘅九西立法會選舉。傳聞李梓敬同梁美芬關係唔錯，仲試過同一班同學去梁美芬大宅拜訪，唔知道梁美芬有冇引薦高徒畀西環？但至少食到西環鍾意有法律知識背景嗰條水。

而李梓敬原來亦喺另一個西環契仔、九龍東立法會議員謝偉俊嘅律師樓實習，八方問過李梓敬，佢承認曾經喺謝偉俊律師樓實習，但因為而家忙緊初選，就冇繼續實習；至於佢同謝偉俊嘅關係，佢就不願多談。

「李」唔講，大家都心照啦！建制中人普遍相信，今次新民黨突然搞黨外初選都係中聯辦「旨意」，目的都係勸退戰鬥力較為弱嘅容海恩，改捧近日喺藍營做YouTuber而火速上位嘅李梓敬，以保住立法會建制派議席過半。上述西環捧上位嘅契仔女，選戰從未輸過；西環最近換埋新主任，八方唔知駱惠寧治下，西環捧人戰立會，係咪都要繼續無往而不利？但好肯定係李梓敬人氣太勁，早前已經紋咗嘅眉，今日又被關注，同2016年已經紋眉嘅工聯會鄧家彪齊名。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此