大凌集團（211）由04年4月停牌到家已經超過6年，何時復牌恐怕連菩薩都答唔到，幾年間，小股東未停過爭取復牌。噚日爭取復牌行動突然升級，有一個來自重慶嘅「小股東」周本菊同埋「塘邊鶴」、「獨立資深投資者」何先生，向小額錢債審裁處遞交申索書，狀告港交所（388）上市科總監陳肇鈞，佢地分別提出索償3萬9千蚊同500蚊……無錯，係4皮嘢唔夠同5嚿水！

另有股東索償3.9萬

阿周姓「小股東」要告咩呢？佢話陳肇鈞疏忽，錯誤行使停牌機制，導致佢所揸嘅300萬股大凌股份未能套現，要港交所賠錢，至於阿何生呢？佢就話陳肇鈞涉嫌違反基本法「個人有個人處理個人財產自由」，希望藉此喚醒公眾對港交所係咪有人權力過大作反思。
港交所發言人按例唔評論，但就強調響考慮對上市公司係咪行使停牌或復牌權力嗰陣，要兼顧現有股東同未來準投資者嘅利益，同時，佢亦還拖話證監會嗰邊正就有人涉嫌違反職責、收受財務利益、並且喺未得股東授權進行若干交易，向大凌展開法律程序，呢單嘢仲要等上市委員會對覆核紀律行動裁決落結論……連基本法都出埋，唔知下次「小股東」要港交所會出咩招呢？

李華華
mailto:[email protected]