韓劇《主君的太陽》嘅40歲男星蘇志燮夥拍36歲女星孫藝珍主演嘅新片《現在很想見你》將於下月14號白色情人節上映，日前二人現身發佈會造勢，孫藝珍今日亦喺Instagram上載同蘇志燮合照，力谷新片。

《現在很想見你》改編自日本同名小說，日本更曾拍成電影及電劇，當中日本電影《藉著雨點說愛你》由竹內結子及中村獅童擔正，而故事係講述1年前已離世嘅愛妻突然喺雨季出現，不過妻子卻失去記憶，一家人度過一段溫暖嘅時光。

由於下月喺韓國上映撼正朴海鎮同吳漣序主演嘅《奶酪陷阱》，所以《現在很想見你》都密密公開新劇照力谷電影，當中劇組就先後公開多張劇照，可見孫藝珍同蘇志燮情深攬攬，其中一張海報孫藝珍仲好似主動咀蘇志燮一樣，而孫藝珍亦喺Ig公開同蘇志燮手拖手嘅合照，佢仲用app張二人嘅樣貌配上公仔樣，十分可愛。

更多韓流，喺晒《娛果》
http://fb.com/appledailyent