【為小三平反】新歡舊愛都係已婚 傅嘉莉:本身有問題先介入到
小三傅嘉莉鄭俊弘何雁詩肥叔叔莊天龍
傅嘉莉噚日喺商台接受訪問,啱啱剛播完嘅《我瞞結婚了》,傅嘉莉被安排做黃翠如同洪永城(Tony)婚姻嘅第三者……。
傅嘉莉話估唔到結局有咁多迴響,有人留言鬧佢,亦有人留言問佢「你唔知佢哋結咗婚嘅咩?」,演小三演到俾人鬧,傅嘉莉話:「呢啲事現實生活都會發生,唔單止發生係我身上,身邊朋友都會有機會,都會唔知對方有咩感情關係。」
喺傅嘉莉身上發生嘅事,包括曾經被本報影到佢喺車廂啜爆已婚肥叔叔富商Low Check Kian,之後又有指佢搭上坐擁17億身家嘅已婚上市公司CEO莊天龍,其後更有年約50歲富豪新歡。(新聞連結: http://bit.ly/2b9MIw1 )
咁傅嘉莉接唔接受到男友因為你而分手、或者離婚?佢即斬釘截鐵話:「佢分手唔會話絕對係因為我,就算係分,本身佢哋有問題,其他先可以介入到。我唔會主動或者催促,叫對方同女朋友分手,知道係清清楚楚好啲,唔想太複雜。」
講到做第三者,噚日何雁詩被人話係鄭俊弘同未婚妻嘅第三者,傅嘉莉即時賦予同情:「應該等當事人去講,好似劇咁,感情事,我唔會多加評論。呢啲事係拍拖都會發生,譬如我識個男仔有女朋友,but我會俾番個男自己揀,始終你同對方嘅感情,建基於咩,發生啲咩,其他人唔知。」
傅嘉莉話做咗全職藝人兩年,佢認為藝人感情事,都係自己嘅事,唔需要同大家交代:「(藝人)都係人,都係要生活,面對生活所面對嘅事,太多干涉,好辛苦,好大壓力,又要交代,其實需唔需要交代呢?普通人拍拖,需唔需要同其他人交代,大家係咪要企番開少少。」
但係偶像係好多人嘅模仿對象?呢個問題傅嘉莉又唔敢去否認,佢話:「都係要注意,兩者要平衡,當然所有嘢做得好,係好,好多時有好多不可抗力因素,我自問唔叻,唔搞咁多嘢住喇!」