周一英超獨腳戲紅魔鬼曼聯飽食驚風散，先失兩球下靠末段尼曼查馬迪神來之筆救主3:2反勝水晶宮，不過隊波上半場嘅表現認真唔掂，特別係兩名身價最高嘅球星保羅普巴同阿歷斯山齊士，前者就繼續夢遊球場，後者更加丟失控球權多達19次，畀利物浦名將加歷查狠批踢到好似「小學雞」咁，以二人咁差嘅狀態，周日雙紅會點鬥如日方中嘅利記啊？

話說紅魔上半場先被安祖斯唐辛遠射，省中後衛域陀連迪路夫入網半場落後一球，兩名擔任《天空體育》嘅講波佬加利尼維利同加歷查就開始發表偉論，狠批普巴同山齊士嘅表現。

加利佬率先開炮：「普巴好似同隊友喺公園玩緊一樣，如同一段youtube或Instagram上嘅短片，睇起嚟冇認真對待比賽，佢係場上嘅表現根本就喺個笑話！難怪對上幾個禮拜摩佬都唔用佢喇。」

而加歷查就話：「睇下曼聯拎住個波個陣嘅處理方法幾咁求奇，你提到普巴表現唔好，我就覺得山齊士更加敗家，單單上半場山神已經甩波多達19次，呢樣野係幾咁難以置信，因為我哋討論緊嘅係一位被認定係世界級嘅球員，但我唔知佢係場上踢緊乜。山齊士同普巴就好似小學雞一樣，係學校球場入面大叫我係最好嘅球員，我鐘意點踢就點踢。」

-------------------
永不獨行！利物浦 FC 當季球星降臨《BFB》！立即帶領紅軍，創造新輝煌！ http://bit.ly/2oQObi1