「追追趕趕，高高低低，深呼吸然後與你執手相隨，甜蜜中不再畏高，可這樣跟你蕩來蕩去，無畏無懼」無畏無懼？Are u serious？

中環海濱「香港摩天輪」，新舊營運商傾唔掂數，搞到一塌糊塗。先撇除到底係單純商業糾紛，定係政府安排失當，呢壇嘢畀香港人最大嘅啟示係：識朋友，最忌識著「投資推廣署」。即係點？就係嗰種「酒逢知己千杯少，你一出事即閃人」嘅So called朋友。

如果大家有印象，想當年2014年，大家聽話中環開摩天輪，真係連香港人都潑冷水，「摩天輪得60米咁鬼矮，100蚊先15分鐘好唔抵。」當時瑞士營運商Swiss AEX都係預期，一年都係100萬人坐。

點知三年過去，夾夾埋埋有500萬人次去玩，算係超額完成任務。嘩，摩天輪咁叻叻，當年Swiss AEX CEO仲力讚投資推廣署幫到手。正所謂有威唔食，罪大惡極，推廣署當然有將「香港摩天輪」Case貼堂放上官網認威威。

不過，朋友，推廣署真係當你一秒朋友。依家一出事，真面目現晒形，表演「割蓆無難度」，官網成個摩天輪Case deleted。咁即係咩意思呢？「我喺FB unfriend咗你啦，我哋冇Friend過架。」話晒過去三年，Swiss AEX有功又有勞。推廣署咁樣一刪Post，氣度當然就冇，更重要係話俾人聽，「外國公司Welcome to HK，但你有事，我閃先，You eat youself la。」

投資推廣署過橋抽板式對待外國公司，唔係第一次。想當年推廣署都有幫Uber引入香港，更放上官網力讚話「接通全世界、幫到乘客又幫到司機」真係好巴閉，結果一入香港，就落閘放狗，投資推廣署又漏夜鏟文。講近啲，Gobee.bike又係推廣署幫手引入香港，結果又係入到香港先畀人話犯法。

當你去健身中心買Package，Sales講到呢樣得嗰樣冇問題；點之買咗Package發現呢樣唔得，嗰樣又Book唔到，你會點形容呢件事？我會叫做「騙局」。

喂喂，呢三間公司，佢哋就聽投資推廣署嘅推銷，真係做咗投資啦；結果係點，就係變成一系列「中伏案例」……佢哋可以做嘅，就只係唱隻歌，失落之處仍然會笑著哭，香港的中伏，默默迎送。

最後，睇下投資推廣署嘅簡介：

本署致力引進對香港經濟及發展策略有利的投資，並鼓勵這些投資項目留港發展，一切服務以態度熱誠、重視誠信、專業服務、以客為尊、方便營商及迅速回應為原則。

本署服務海外及內地企業，助其在香港開業或拓展業務，客戶涵蓋中小企業以至大型跨國公司，從業務籌劃以至開張擴展各個階段，均免費提供專業意見及支援服務。

by千頌C@堆填區
http://fb.com/winbigwok