大師兄返嚟喇,曾經喺中環蒲精界叱吒一時嘅中環翠華,聽日(12月11日)就會正式回歸中環威靈頓街!聽日下午一時四十五分開始,仲有會銀樂隊會由國際金融中心巡遊表演去到威靈頓街店門前㖭。費清今晚一馬當先去現場率先望吓,點知一望以為自己搞錯,點解變咗鏞記㗎?
事關,重新裝修嘅翠華,雖然冇大狗,但個門口好高,而且金碧輝煌,土豪味濃,驟眼睇以為有人喺鏞記對面開另一間鏞記打對台...再望入店內,連啲枱椅都靚曬,有曬座墊咁。聽講新店仲會推出英式下午茶(HighTea),吸引高端客,都要成$200㗎,雖然係平過酒店,但對於茶餐廳嚟講,已經天價。
不過,翠華確實已經唔係茶餐廳咁簡單啦,單係價錢已經...佢哋喺香港共有34間餐廳。
天要落雨娘要嫁,翠華要upgrade到2.0都冇人可以阻止到。不過,費清好懷緬舊時嘅翠華,喺附近蘭桂坊蒲嘅人,蒲到咁上下,都會好似百鳥歸巢咁嚟到食碗魚蛋河,但醉翁之意不在河粉,只係想喺烏燈黑火嘅夜場外,搵個光猛嘅地方睇吓對方真面目...seeandbeseen,翠華將來係咩樣,就要拭目以待,認真睇吓喇。
費清#要生計,也要生活#毋忘初衷