【石希露fb爆粗】火火問邊個鬧TVB 小方:果然係ViuTV愛將
愛將識撈火火ViuTV
ViuTV真人騷《美選D.n.A》噚晚首播,一班美選女約埋三位主持兼評審方力申、郭偉亮(Eric)、火火去中環一間酒樓齊齊睇電視,7號崔菲嫣(Faye)寸爆18號「巨胸翠如」鄧月平(Larine)「有容乃大」o添!
對於有傳聞Larine係內定冠軍,12號李靜蓮(Alina)坦白話相信有內定呢回事﹕「我信嘅,呢個世界本來就唔係一定公平,我冇話佢啲乜嘢,人生一定係咁。(仲會繼續玩?)梗係,做好自己。」其他佳麗睇好11號羅伊婷(Daisy)同15號馬倩宜(Happy),Daisy就話﹕「咁我都信有,但唔係話呢個比賽,我參加呢個比賽都唔係為冠軍,只係想喺ViuTV繼續發展,咁我同佢賣(點)嘅嘢都唔一樣。」Happy就話當遊戲玩﹕「我最近聽咗首歌,話贏輸係天知嘅,係天曉得,我覺得佢非池中物,係一個好好嘅對手,就當一個好好嘅遊戲,狠狠地去玩。」
早前喺facebook講粗口鬧爆ViuTV嘅16號石希露(Olga)臨時甩底飯局,事緣節目中唔留情面踩Olga演奏大提琴表現差嘅Eric Kwok就話:「我哋唔係淨係激嬲Olga一個㗎,我哋個個都激嬲,我哋啲評語實在太苛刻,啲ladies冇機會畀我哋收歛,佢哋太唔爭氣。」
火火突然問邊個講粗口鬧ViuTV,仲越講越亂﹕「咁邊個講粗口鬧TVB?」大家起哄拍手,小方狂笑指住火火:「你果然係ViuTV愛將呀!」火火一臉無奈:「我講錯啫,我真係講錯之嘛。」