今次選舉好多女候選人，助選團中女性為數不少，八方噚日巡迴各大選區，發現唔同黨派都有「選舉之花」，拉票時可能事半功倍。最醒神嘅可能係「街工張惠妹」Carrie，呢個稱號並非八方畀佢，事實上佢話唔少朋友都覺得佢有幾分似張惠妹。
廿幾歲嘅Carrie噚日熱褲上陣拉票，喺一眾助選團中真係幾矚目，佢曾做街工幹事，𠵱家做再培訓課程導師。Carrie認識梁耀忠幾年，覺得阿忠係實幹工會領袖，好欣賞佢為工友努力，受佢感染自己都為工會工作，幫佢助選義不容辭。

又曬又熱唔覺辛苦

「環保觸覺」譚凱邦出選九西，佢冇大政黨支持，助選團多數係後生仔同學生，Venus噚日一早就上街幫譚凱邦派單張，八方見佢派單張好似唔多純熟，唔通係新手？Venus話自己係譚凱邦朋友，知道佢參選梗係要支持，雖然勝算不大，但因為認同佢嘅環保主張。Venus坦言派單張確係唔多順手，因為譚凱邦強調要環保參選，今次選舉盡量少派單張，平日拉票都係以嗌咪為主，所以佢哋其實唔多想派咁多單張。
白鴿黨都有唔少女性加入助選團，今屆新界西高達形勢危急，黨總部特別指派「紅粉兵團」拯救高達，其中一個義工蘇小姐話今次係首次參加助選，第一次就咁畀咗高達，可以話係「民主黨馬茜」，不過佢承認其實唔係太認識高達，只係報名做白鴿黨義工，有關方面叫佢到新西幫手。
「馬茜」話助選唔係太辛苦，只係天氣又曬又熱，企喺街上都幾難頂，至於日後會否繼續幫手，佢話視乎情況。同蘇小姐一齊幫高達手嘅潘小姐，亦係「處女下海」初次做助選團，暴曬成日，佢都話唔覺得太辛苦。
八方見潘小姐斯斯文文，似係OL，佢冇透露自己工作，只係話以前睇新聞，唔同助選團偶有衝突，甚至動粗，初時令佢有啲擔心，但今次做助選團，佢卻發覺唔係咁敵我分明，唔同陣營助選團之間，其實有講有笑，大家會傾吓偈，冇佢想像中咁緊張，助選咁好玩，下次可能再做。

mailto:[email protected]