【細個讀法律】劉晨芝睇美國警暴睇到喊：警暴放喺邊都唔啱
蘋果日報 2020/06/03 20:30
劉晨芝
（攝影：陳慧安）
劉晨芝今日到觀塘為葉家寶及黃守東主持的網台節目擔任嘉賓，她早前透露將回美國為馬田史高西斯（Martin Scorsese）新戲開工，下星期將起程返美：「其實我都好擔心，而家美國槍林彈雨，爸爸啱啱先話喺屋企附近見到有人拎住步槍，真係出街都驚。」
劉晨芝表示爸爸有槍牌，家中亦有槍械：「我自己就冇，但係都有學過，都係當保護自己。」她表示曾在加拿大登台時，台下數千人突然逃跑：「原來台下有人開槍，所以都幾驚，而家美國咁混亂，好多市民都有槍。」現時社會動盪，問她重返劇組會否擔心？劉晨芝說：「我想搵多個人陪我開工，但上次係有人染疫所以停工，今次劇組講明，不必要嘅人員唔准入去。」
提到美國的警暴問題，劉晨芝認為該名警員不對：「唔可以壓住咁耐，我細個已經喺美國讀書，都受過好多歧視，話我黃種人，早前疫症又仇華。」但她強調不可以因為個別警員的行為，認為所有警察都不好：「我都見到有啲警察跪低，希望事情得到和解。」談到不少人把是次美國警暴問題與香港警暴問題相比，劉晨芝說：「警暴放喺邊都唔啱，但係唔可以用一個案件去講所有警察，我都見到好多警察係熱心去幫人嘅。今次美國呢件事，我睇到喊，覺得你有冇良心㗎？我細個都有讀法律，呢啲警暴問題起碼要上庭，有個審判，無論係警察、公務員、市民都應該上庭，畀法官去審理。」
提到美國的警暴問題，劉晨芝認為該名警員不對。
劉晨芝今日到觀塘為葉家寶及黃守東主持的網台節目擔任嘉賓。