四叔李兆基旗下嘅中華煤氣（003），今年150歲生日。為咗慶祝呢個大日子，四叔早前決定向員工大派金幣，員工日前收到通告，噚日起可以到指定嘅金行，領取呢枚刻有煤氣標誌嘅紀念金幣。
四叔之前抱孫，曾經向員工豪派一萬蚊大利是，今次旗下公司大壽，出手就更加闊綽，做滿三年嘅員工，獲贈嘅金幣重量達一盎司，以現時金價計算，價值高達12,680元；服務一至三年亦有一枚二分一盎司金幣，值6,000蚊有多；即使年資唔夠一年，都有利是仔一封，可以話係人人有份，永不落空。

煤氣有2,000員工，據華華所知，煤氣超過九成員工年資三年以上，計落成個派金計劃最少要使超過2,200萬銀，對於打工仔嚟講梗係大數目啦，但係喺四叔眼中就肯定濕濕碎。據了解，好多員工噚日都第一時間到金行領取金幣，袋袋平安嘛。
其實煤氣今年對待員工確係唔錯，除咗送金幣，公司今年1月已好罕有咁向員工額外加薪1.7%，係繼去年7月加薪3至5.5%後，半年內第二度加薪。7月係煤氣加薪月，中華煤氣華員職工會主席蔡金華同華華講，由於通脹高企，工會早前同管理層會面時，提出今年加薪7.5%，估計6月底有定案，希望好消息陸續有來咁話。華華作為打工仔，祝你哋得償所願啦。

李華華
mailto:[email protected]