韓國男歌手黃致列憑內地節目《我是歌手4》而於內地走紅，不過早前內地演藝圈傳出「限韓令」，黃致列就成為首名中槍嘅韓星，於浙江衛視嘅《挑戰者聯盟》中鏡頭被刪掉，節目組又用logo遮去佢個樣。近日，黃致列被內地網民爆佢只用內地粉絲送嘅貴價禮物，對於手工製品同便宜小禮物就不屑一顧，引起網民不滿。

據網民爆料，黃致列經常收內地粉絲禮物，通常都係貴重物品，包括德國訂製、值40多萬人民幣（超過46萬港元）嘅專屬耳機、LV頸鍊、名牌服飾等，黃致列都會好高興地收下而且立即戴上，不過對於手工製品同便宜嘅小禮物，黃致列就全部留喺酒店。有網民於黃致列退房後，拍下房間內一袋袋被遺留於地上嘅禮物，並於網上公開照片，留言批評黃致列「勢利」、「愛心是送給人民幣而不是粉絲」等。

當然亦有粉絲力撐偶像，指冇證據證明禮物係屬於黃致列，又指黃致列都有珍惜粉絲送嘅襪、鮮花等小禮物。

今日，黃致列方面就發聲明回應，指網民「無中生有」，又解釋黃致列有將禮物帶返韓國：「留下嘅只係紙袋包裝。」