9歲嘅譚芷昀(Celine)，最終未能實現願望晉身《全美一叮》，被喻為「香港小巨肺」嘅Celine，早於參加《全美一叮》前，喺《中國新聲代》同《全英一叮》嘅預賽中，已經表現出佢嘅音樂天份。

回顧佢呢3個月喺《全美一叮》比賽，由甄別賽再到準決賽，晉級過程有驚喜，有危機，更意外嘅係，連帶Celine爸爸譚順生，期間亦惹落唔少是非。

今年6月，Celine喺《全美》嘅甄別賽中，以偶像Celine Dion嘅《My Heart Will Go On》，佢嘅preview比賽片段一出，點擊驚人，喺facebook同YouTube，當時就錄得超過2千萬次瀏覽紀錄。

Celine最終順利晉身8月名為「Judge Cuts」嘅淘汰賽，演繹Michael Bolton嘅經典情歌《How Am I Supposed To Live Without You》，獲Golden Buzzer直送入半準決賽，成為史上首位華人獲此榮譽。不過呢次比賽後，Celine喺網上開始招惹負評，唱作人Eric Kwok就彈Celine唱失戀歌欠感情似機械人。

喺半準決賽時，Celine就揀咗Mariah Carey同Whitney Houston合唱嘅動畫《埃及王子》（Prince of Egypt）主題曲《When You Believe》，雖然成功入準決賽，但評判對Celine評價開始有分歧，評判之一嘅Mel B批評Celine揀錯歌，認為佢駕馭唔到。到日前Celine喺準決賽再以動畫《魔海奇緣》主題曲《How Far I'll Go》出賽，但再次被Mel B批評佢揀錯歌，最終Celine十強止步。

Celine參賽《全美一叮》，為港人爭港，原本係美事，但期間卻間接令老竇譚順生被揭臭史。最初先由家燕媽媽開炮，指對方居心叵測，繼而就係話譚順生屈《中國好歌聲》冠軍張翊龍係自己學生，之後再被揭歌唱獎項同本身首歌面世嘅年份有出入，最後仲有人質疑佢個博士銜頭真確性。

到8月中，Celine同屋企人到機場出發到美國，參加《全美一叮》比賽時，譚順生被機場保安開咪「借個女上位嗰個」，事後該保安遭炒魷，事件引嚟網民熱話，為平息風波，Celine經理人蕭定一發聲明，指公司冇要求要解僱對方，事件先告一段落。