鄭家孫女初長成，養在深閨大家終於都識！新世界發展（017）董事總經理鄭家純位千金鄭志雯，唔經唔覺負責新世界嘅酒店業務接近兩年，噚日首次透過新聞稿，講解發展藍圖，透露新世界中國（917）旗下新世界酒店，計劃喺未來五年，投資85.8億擴展業務，開超過40間酒店。
鄭志雯今年29歲，同大哥鄭志剛都喺美國名牌哈佛大學畢業，擁有哈佛應用數學文學學位，主修經濟，曾經喺一間國際投資銀行同埋美資私募基金，負責地產業務。08年底回歸家族生意，負責新世界發展同新中嘅酒店業務；09年2月坐正做新世界發展酒店首席總監，同埋新中旗下新世界酒店執行副主席。

5年內投資86億

不過，鄭志雯一直埋頭苦幹，甚少公開講述業務發展。相反，佢兩個兄弟──志明與志剛，因為分管新世界發展及新創建（659）兩間上市公司，早就粉墨登場，成日要同傳媒分享公司發展大計。
今次佢發出新聞稿講述發展計劃，可能係參考最近港交所李小加，同埋恒隆地產（101）董事長陳啟宗發表「萬言書」嘅做法，年紀輕輕已經識得效法猛人，叻女！
鄭志雯集中講解新中旗下新世界酒店嘅發展策略，新店主要喺內地同東南亞經營新世界同貝爾特品牌嘅酒店，現有8間酒店。佢又話，諗住響未來五年投資85.8億元擴展業務，希望開設超過40間酒店，現有20多個項目正在發展中，除咗新世界及貝爾特，亦會推出一個全新高級酒店品牌……大嗱嗱86億投資，好明顯阿爸同阿爺彤叔，已經對鄭志雯投下信心一票，成績如何，拭目以待。

閉關兩年　正式考牌

咪睇鄭志雯年紀輕輕，對於酒店業務經營方針，其實佢已經有自己嘅一套！佢認為，今時今日嘅酒店業不斷走向商品化同產品化，背棄咗「以人為本」嘅待客之道，所以佢提出「以心為本」，希望重新建立與客人之間嘅長久關係！
有個咁高嘅職位，佢嘅志氣亦唔嘢小，就係希望新世界酒店利用未來幾年發展，成為一間國際酒店企業，擁有獨有嘅企業文化，響業界訂定新指標同標準，令品牌同所代表嘅獨特文化備受國際認同。佢亦都好明白到龐大嘅中國市場有幾重要，預期未來收入有一半以上嚟自內地，二、三線城市更加係主要動力來源。
仲記得鄭家純早前曾經講過，將會畀幾個仔女幾年時間，響新世界系內嘅公司發揮所長，觀察吓邊個適合做邊一瓣生意，家陣鄭小姐苦練兩年後出關，好明顯「考牌」家正式開始！

李華華
mailto:[email protected]