【有女萬事足】自爆冇幫太太剪臍帶 陳柏宇:意義不大
陳柏宇符曉薇Abigai
陳柏宇(Jason)太太符曉薇日前誕下囡囡Abigai,成為新手爸爸後今日去到中環,為聖誕節舉行嘅音樂會宣傳,屆時囡囡已三個月大,可以一齊到場。
睇得出做咗爸爸嘅Jason好興奮,除咗為囡囡開IG post相紀錄外,自己都會掛住囡囡嘅得意表情,Jason話:「呢兩日都九點起身去醫院,比平時早,所以運動都hea住操。」Jason話BB雖然早產,但就唔算太狼狽。
望住阿女已經勁冧嘅Jason,一副有女萬事足笑容,至於女兒似邊個?佢就話:「屋企人話似我,我真係唔知似邊個,我細個都好靚女。」暫時Jason仲未有機會親自替囡囡換片沖涼:「有姑娘幫手,餵母乳又唔關我事,所以只係負責抱同玩,望住BB,留意佢表情。」女兒英文名為Abigai,中文名則交由師傅取名,o依家等消息中。
Jason話太太生B翌日已可落床行走,精神唔錯,但餵哺人奶最初都唔舒服,今日已經好熟手,仲話:「餵人奶好好笑,原來唔係俾個乳頭BB食奶,係要趁BB擘大口,塞個頭埋去食。」今次Jason冇幫太太剪臍帶,佢話自己唔係驚,只係覺得剪臍帶嗰陣BB已經出咗嚟,意義不大:「不過見到BB一刻確實超感動地喊,以後若要往外工作太長時間都會唔捨得個囡,不過雖然要考慮,但錢總要搵。」目前Jason正想辦法解決家中寵物同BB嘅共融問題:「希望喺衛生上找到兩存其美方法,唔需要分隔佢哋。」
精選娛聞,喺晒《娛果》
http://fb.com/appledailyent