4年前，王君馨(Grace)接受訪問時，自爆仲係處女，令佢一夜成名， 而自從佢嘅處女宣言一出，其他圈中教友包括鍾嘉欣、李亞男、苟芸慧同岑麗香，亦相繼宣示處子身，因而有「處女黨」稱號。4年過去，李亞男率先喺上年2月嫁人做咗祖藍嫂，而鍾嘉欣亦喺今年嫁人生女打孖嚟，加上岑麗香同王君馨掛住拍拖，「處女黨」稱號幾近名存實亡！

王君馨(Grace)
Grace係最早出現嘅處女黨成員，不過3年前佢俾人影到同男友Daniel去台灣旅行，暗示佢哋已預支蜜月，但當時處女馨堅稱大家係分房瞓未破戒。日前佢就承認男友已求婚。同女友神交多年，Grace男友終於等到「拆禮物」呢一日。

鍾嘉欣(Linda)
同伍允龍拍拖多年嘅嘉欣BB，分手冇耐，舊年年底秘嫁加拿大脊醫Jeremy，今年五月宣布懷孕，上個禮拜二(23日)終於生咗B女，係「處女黨」最快做咗人媽咪嘅黨員。

李亞男(Leanne)
6年前同王祖藍發展「長短腳之戀」，無驚無險，舊年2月正式成為祖藍嫂，係最快嫁得出嘅「處女黨」黨員。老公o依家長期北上，李亞男亦嫁雞隨雞，跟實老公拓展大西北事業。舊年祖藍豪擲1.1億購入大埔逸瓏灣特色戶，作為新婚愛巢，李亞男亦正式加入億萬濶太行列。

苟芸慧(Christine)
曾為「宅男女神」嘅苟芸慧，早年傳出佢介入城城同熊黛林嘅戀情，之後因甲狀腺問題，由弗爆時嘅115磅一度飆升至170磅，人氣不再。近日體重回落嘅苟姑娘，先後傳佢撻着好友朱璇男友湯珈鋮，又秘交經濟發展及勞工局前局長葉澍堃細仔葉瀚華、近排又同富三代陸恭和傳緋聞，但苟姑娘通通否認，似乎真命天子仍未出現。

岑麗香(Eliza)
性格鬼妹仔嘅香香，舊年10月俾《蘋果》踢爆名花有主，同圈外男友Joshua拍拖。事後香香大方承認對方係男友，仲話男友有共同信仰，會守教規。