50歲的黃寶欣，退出樂壇多年，做過保險top sales、開過按摩店，依家仲開埋手打酥皮蛋撻店「酥妃皇后」，新店位於九龍城，噚日開始試業，初五正式開張。

之前黃寶欣於周刊訪問中承認，今年辦妥離婚手續，正式結束20年婚姻，重新出發。在家中休息十年，仔大女大(大仔18歲，今年升大學喇)，黃寶欣覺得都係時候出返嚟睇下呢個世界，重投社會創業，所以先至有「酥妃皇后」的出現。

新店開張喜氣洋洋，談到婚變原因，黃寶欣禮貌地謂不想多談。據知其前夫是生意人，經常留在大陸做生意，長期不在一起生活，步伐漸漸不一致，黃寶欣試過挽救，但最後雙方決定和平分手。

黃寶欣今午接受《蘋果》電話訪問時謂，與前夫仍保持好朋友關係：「OK㗎，其實我哋都係經過深思熟慮(決定離婚)。仔女當然唔會支持呢件事，但係佢哋都會配合。同埋我哋都係以仔女為最大原則去處理，大家好開心好和睦，到依家都係相敬如賓。」

「因為啲細路細個嗰陣，都係以照顧佢哋、培育佢哋為最前頭嘅嘢，到佢哋大嘅時候，佢哋有佢哋自己世界嘅時候，我自己都係時候為自己嘅人生安排一下，其實都係人生第二階段，我覺得好開心，OK 㗎！」