第70屆艾美獎已完滿結束,除咗劇集本身,兩大電視台HBO及Netflix亦暗中惡鬥。HBO過去16年來都係艾美獎最大贏家,但今年就被Netflix追平,兩個電視台都分別獲23個艾美獎。其實業界於7月宣佈提名時已非常驚訝,因為Netflix第一次於提名數字上贏出HBO,獲得112個提名,而HBO只得108個。雖然今晚最終大贏家係HBO嘅《權力遊戲》(Game of Thrones),共贏得9個獎,更獲最佳劇情類劇集,不過由數字上顯示,串流電視台Netflix已經具足夠實力,挑戰美國傳統電視嘅「大台」。