難得撞到正BoxingDay，有甚麼應節得過講講跟買衫有關的各種贈品和贈券呢？
讓我們一人拿着絲帶的一邊，預備好拆禮物沒有？3-2-1……

ToteBag世界

做甚麼行業都好，感謝祭的最佳形式一定是折扣！要送東西的話，當然cashcoupon是首選啦！（我哋唔怕老套o架！呢方面唔使咁創新o架！）不想那麼「現兜兜」的，就送贈品囉！如果是這樣的話，我估最難做的應該是時裝店老闆吧？送個甚麼款式的贈品才能一貨中百客，人人都喜歡呢？除非翻牆越界去送罐清湯鮑或者高級毛巾套裝禮盒或者「i」字頭的任何東西，否則要堅持守着「本行」的話，也很難研發出一件男女老幼咸宜的單品吧？

我記得以前要是真有時裝店要以「時裝」作為「買滿×××元即送」的禮品的話，通常都不敢「獨裁」，是要有得揀的，起碼要有男人啱使的領呔皮帶和女人適用的頸鏈絲襪，遇上企圖偷懶「通殺」的商戶，我們便被迫硬食了好多好悶的雨傘和頸巾。幸好近年提倡環保，人人Bring極YourOwnBag還是不嫌多，便由環保袋一統天下成為任何行業任何商戶任何產品任何季節的長青單一最受歡迎贈品榜之永遠冠軍。
老實講我是不應咁掃興唱反調嫌太沒想像力嫌悶的，說不定有報應下個月自己便有個甚麼活動，要設計一款又經濟又美觀又人人受用的紀念品，而我又是揀了個totebag，但這一刻，在未有更具建設性的suggestion的情況下，我還是得聽從我的心說一句，再送totebag做贈品真是好Q悶！唔好意思！

贈與興

信我，我真的有個朋友，專登買了個6千幾蚊BV的特長織皮wallet日日帶住出街，你估要嚟裝乜嘢？你咪睇落去先，我畀你估3次，你估乜嘢嘢值得專登買6千幾蚊嘅銀包載？
唔係！
唔係！
唔係！
雖然我聽唔到你估乜嘢，不過我估你一定估唔中，因為並唔係一個正常人可能估得中嘅嘢！
嗰日佢終於打開個成10吋×5吋嘅BV銀包畀我睇，裏面全部都係喺報紙雜誌剪落嚟嘅特價coupon，餐廳埋單之後送畀客下次返去幫襯嘅優惠券，隨信用卡junkmail附上之免費試用證……總之是碎碎濕濕幾百張爛紙仔，我本來想問：「你要享受幾多呢啲『優惠』先慳得夠買這個6千幾蚊嘅銀包呀？」但聽到這位年薪過百萬的friend一邊如數家珍那一張爛紙可以免費贈食「狗不理包子」，那一張二人通淋巴又一人價錢……便明白她志在的是那個有如尋寶遊戲的形式，或儀式，多於實際上可以節省的一百幾十，都市人根本太悶太冇嘢做想「搵啲嘢畀自己做吓」，就係咁簡單。
那一秒，我便決定以後和她多逛街喝茶，也許那個BV銀包和裏面的爛紙便會快點消失吧！

抽獎的儀式

不過，我一直都贊成適當的儀式是令生活更有趣的，舉個例，台灣麻雀為甚麼自摸後「拍」了埋去便糊不出？娶老婆為甚麼要過×關接新娘？這些規矩沒有了也做得成原本的動作呀，但多了些花臣搞吓大家便有多啲嘢玩吓囉，生活很多時是被這些多餘的「儀式」豐富了呀！
但謹記這些儀式「適可而止」而且「夠有趣」囉。
那便關乎taste了。
近乎許多時裝店都嫌傳統的大減價大抽獎形式太悶，紛紛「搞搞新意思」，偏偏很多是搞過龍了，令人有少少不知所措，甚至煩。
我所能理解及接受的極限大概是──「買3件減價貨品第3件免費」，OK，即是三樣中挑最平的送你，其實等如（最多）再給你打個六六折，有點複雜也有點滑頭，但至少計完一輪還是可以明白。
我遇過最不畸形的減價計劃是幾年前某時裝店的……姑且稱之為「planF」吧。真是值得F的。
那次呢，作為顧客，你如果想獲得優惠，便要在某日至某日那兩星期間到×集團旗下的其中4間店購買指定8個品牌貨品滿若干元，之後的兩星期再到同集團的另外5間店購買指定的另外10個品牌貨品滿若干元……如是者玩足4次達兩個月之久才能參加一個抽獎，嘩，是不是齋聽都煩？可憐那時裝集團的售貨員們不但要負責執行這個怪制度，還要向每一位走進店內的客人將我剛才那段又長又臭的「遊戲方法」逐個講一次，你說是不是雙重的行政浪費兼趕客？
其實有心回饋顧客，簡簡單單結結實實就好，加點小刺激無妨，太複雜擾民的就大可不必了，對我來說，這方面的經典傑出案例，居然來自「裕華國貨」！
對，我記得廿幾三十年前我的青少年時候，他們搞過一個這樣的抽獎，顧客揀好的東西，在付款前先去抽獎，抽獎部有張大麻雀枱，枱上好多麻雀顧客任揭一隻（不是「甩」，是揭呀吓，「甩」唔得掂！），揭到「九萬」就九折，「五筒」就五折，「一索」就一折（當然「九」的牌比較多好多），折扣多少全由客人「自摸」，真是又簡單又好玩又刺激，值得復刻o架！
Textby黃偉文
mailto:[email protected]
微博 http://t.sina.com.cn/wymanwong
本欄逢星期日刊出