美國女星梅根馬克爾（Meghan Markle） 同英國哈里王子大婚將於5月19日隆重舉行，最近兩人嘅愛情故事就被電視台改編成劇集，更襯住大婚熱潮搶先播出，不過由於製作費唔高，唔少場面同選角都勁「流」，引發網民恥笑。

電視劇名為《Harry and Meghan: The Royal Love Story》，由奀星Murray Fraser及Parisa Fitz-Henley分別飾演飾演哈里王子及梅根，最近預告新鮮出爐，當中有好多二人親吻甚至上床嘅親密片段，更重現求婚一幕，劇中「哈里王子」仲話：「我嘅人生唔需要好似一幅完美嘅王室相咁，我只需要你。」雖然預告就幾浪漫，不過同時發佈嘅劇照就嚇親人，首先飾演佢阿哥威廉王子一家嘅演員勁唔似樣，飾演英女皇嘅演員個樣仲奸到出汁，認真驚嚇！唯一好少少嘅已經係戴安娜王妃，起碼個樣正正常常。有網民仲恥笑話，好少見啲真人真事劇集，啲演員仲醜樣過真人！

精選娛聞，喺晒《娛果》
http://fb.com/appledailyent