聖誕節既然係普天同慶，發展局局長黃偉綸（Michael Wong）日前就聯同副局長廖振新同政治助理馮英倫，齊齊整整到訪保良局西營盤護老院暨長者日間護理中心，同「老友記」傾偈兼玩遊戲，期間MW局長仲同一班公公婆婆做勞作，合力DIY聖誕心意咭，佢話當日玩得好開心，大讚老友記個個好精靈，欣慰社區有完善嘅配套設施，等老友記樂活又健康。

MW局長話呀，長者為社會貢獻良多，點樣為佢哋締造宜居、優質生活環境等佢哋樂享晚年，係大家嘅共同責任同願望，必須有全面部署同規劃，籌備應對人口高齡化嘅挑戰，以便築起長者友善城市，促進「積極樂頤年」。

佢透露會嘗試喺社區注入「動態設計」概念，鼓勵市民多做運動，注重健康，並透過適切城市同建築設計，推廣多步行、多踩單車同多做運動嘅健康生活模式，因為增強健康，係優質晚年生活嘅重要一環。