現處練馬師榜第二位的大摩，正努力追趕領頭羊蔡約翰，攻勢可謂一浪接一浪，不少贏開的摩廐馬都會乘勝追擊，蓋大摩現時只少阿蔡五場頭馬，有機會後來居上稱王。

今期（12日）泥地夜賽，摩廐一對新勝馬「二郎」及「好運」均續配潘頓上陣。睇番此對騎練，從2月至今共合作11匹勝後再出馬，總成績八贏兩位。信數據，以上兩駒都可放心追捧。

第八場三班1650米，「二郎」近兩仗由潘頓接手均贏對手兩馬位以上，包括前次初跑泥地以全場最快末段勝出，看本身走勢仍有餘未盡，轉戰第三班改負輕磅更好跑，用埋王牌報名，更顯示幕後有決心再下一城。

第二場四班一哩，「好運」前仗由賢廐轉投摩廐初出即入位，上賽易配潘頓即補中開齋，人馬一拍即合。

周三（12日）雖是「好運」初跑泥地賽，但潘頓繼續肯騎兼有1檔加持，而同父馬如「八心之友」及「銀紙」當初均首度跑泥即入位，前駒亦未嘗不可打響泥戰頭炮。

-----------------------------
【新聞有價】6月17日起 繼續撐蘋果
http://bit.ly/2IJ24ZR