新地（016）第三代繼續登場。公司噚日宣佈，主席郭炳聯第二個仔郭基泓（Christopher）亦加入做執行董事。郭基泓雙眼好似阿爸，外表敦厚，身家更豐厚，不過靚女們唔好興奮住，呢個筍盤一早被人私有化，結婚了。
Christopher過往甚為低調，通告介紹佢今年29歲，喺美國哈佛本科畢業，取得化學理學士學位之後，再去史丹福商學研究所，取得工商管理碩士學位，2011年加入新地之前，曾經喺一間國際管理顧問公司工作。

佢家陣負責新地嘅中港商住物業銷售、項目管理同租務，亦幫主席爸爸處理其他事務，特別係非地產相關業務，咁即係好多嘢都關佢事喎。
早幾年因為法庭審訊而披露嘅《炳聯日記》，提過郭炳聯點樣睇呢個仔，佢認為「CK's weakness太性急（CK即Christopher Kwok簡稱）」。
其實都唔出奇，後生仔多數性急，唔少富二、三代又想盡快有表現，等佢哋工作多幾年，就知道好多事情係唔急得㗎喇。而講到結婚，Christopher又真係幾急喎，未夠30歲已經成家立室，通告話佢同配偶持有新地11萬股。
講番新地，自從郭炳江2014年底入獄後，董事局成員都有幾多變動，佢個仔郭基煇與郭炳聯大仔郭顥澧已經加入董事局，家陣計埋Christopher，董事局內已有3名家族第三代成員。

李華華
mailto:[email protected]