黃夏蕙和經理人Simon合作近10年，打造夏蕙BB近年極盡騎呢路線，今日二人應邀到銅鑼灣接受節目《關公有約》訪問，夏蕙姨原來經常遲到激嬲經理人，又試過初相識時Simon竟然叫夏蕙姨參加派避孕袋活動，她說：「我當期時話咁老都派得，好尷尬，未見過呢啲嘢又冇用過，覺得好肉酸，後來知道幫到年輕人唔使有BB，又可以乾淨啲。」兩人合作至今有不成文底線，不會接拍被強姦角色，夏蕙姨說：「只要唔傷害人就得，做豬做狗都做過，過年時瞓棺材都照去。」

夏蕙姨早前有份領取演藝人協會發放$9,000援助金，梁思浩公開批評她有錢不合資格，夏蕙姨多次轟政府沒有恰當幫助演藝界，並說：「政府各行各業都幫，連揼骨妹都有幫，點解藝人冇呢？我哋都曾經為社會做過好多事，藝人都係人，都要食飯。」並了解到有藝人及幕後手停口停：「我都半年冇嘢做，車錢都冇，但我未係最慘，化妝、衣服、攝影每日都食穀種，唔係個個有間屋企億億聲。」夏蕙姨解釋早前和經理人講向政府申請資助給藝人，後來有同記者講及事情：「之後好多人嚟問我借錢，我都想同人借呀，政府連海洋公園都幫，點解唔幫下我哋啲藝人呢？都唔知要捱到幾時？已經半年啦。」

演藝人協會發放援助金，夏蕙姨指：「本來想同古天樂一齊向政府申請，件事我有份發起，但我唔知佢哋會點派，初時以為好多人會攞到錢，點不知話兩年內冇做過相關行業就唔得，好多人都攞唔到，但呢啲唔關我事，我都唔知。」

夏蕙姨續稱：「梁思浩突然話我好有錢，係，我係有錢，但未去拎，因為我先夫胡百全死咗之後有基金，都億億聲，思浩唔知我未去攞基金，所以話我好有錢佢提醒咗我，之後會去搞手續，我有六個仔女，連埋我分7份，我承諾將自己一份過億元捐出去，我每日食兩餐好簡單，希望特首可以幫助藝人。」她透露日內去辦手續申領基金，預計一個月完成：「藝人就唔使幫，蝕都億億聲啦，會幫助幕後工作者。」

夏蕙姨自爆申請上公屋排隊中，近兩年亦有攞政府資助金及生果金共3,500元，又不甘被思浩指貪心：「多謝思浩哥哥話我有錢，唔係話我乞兒。」
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新