側田雖然生得唔高大，又唔算靚仔，但身邊女伴總係轉不停，早被外界認定係花花公子。側田喺訪問中亦直認自己喺感情上犯過錯，唔係齋諗咁簡單。

被主持問同一個人拍拖會唔會諗住第二個女仔？側田笑住口咁話﹕「唔單止諗啦！笑乜呢？你夠膽講未嘗試過？大家唔好扮清高，我唔怕認！(成日犯錯？)我錯過好多次，亦曾經多次被對方傷害過。我冇資格講點樣令一段關係可以成功結婚，只不過係一張（婚）紙，我嘅伴侶唔需要我畀名份，佢好open-minded。」

側田與韓籍未婚妻分手後，與現任女友已交往三年幾。(相關新聞﹕ http://bit.ly/2zpDZ4D )問到41歲嘅佢係咪已經修心養性？側田直言係要互相影響，更指「性生活」喺一段關係中好重要，佢話﹕「對手好重要，唔怕講，講真，唔係膚淺，sex很重要！話唔緊嘅（男人）根本就係講大話。」側田越講越興奮，更大爆媽媽係佢嘅開導者，佢話﹕「你要令對方覺得佢sexy，女人亦令到你覺得man，唔少男人以為老婆唔能夠滿足你，你就走去偷食，呢樣好差。你要反問你有冇令老婆覺得Hot嘛？！呢樣係我阿媽由細到大教我嘅，佢都好open-minded！」