MKPop組合Faith鄧鈞耀（Dawn），因為私自接Job、失場同經常Post半裸照喺社交網站，以影響樂團形象為理由而被Out。佢日前接受《蘋果》訪問，佢逐點反駁舊公司。

講到話佢影私相而破壞形象，Dawn引用一個例子話：「大約幾個月前公司叫我去做一個電影Casting，個導演係雲翔，佢拍好多有關性嘅三級片，咁老闆安排咗我去，我去到導演話套戲需要我全裸，連Casting時已經要全裸，我自己接受唔到，老闆有話過同導演傾吓可唔可以唔使全裸，但導演堅持，最後我推咗。我想講嘅係既然老闆叫得我去Casting都預咗我有機會拍全裸嘅戲，咁憑咩話我Post相係破壞形象、教壞小朋友呢？」

Dawn話舊年4月同公司簽約5年，依家被雪藏，覺得好無奈。咁日後打算點？佢話:「我有同公司聯絡過，問打算點處理我哋嘅合約，佢哋話會搵律師同我傾，但暫時都未有進一步消息。」會唔會覺得中咗伏，有無後悔簽約？佢話：「咁又無，過去一年其實過得幾精采，又出咗唱片，又喺新城度攞過獎，都係人生里程碑，所以無後悔嘅。」