董特首﹙圖﹚呢輪好似真係想做番啲嘢，啱啱同傳媒吹風，話會關注公營機構嘅薪酬問題，曾司長就即刻出嚟召見九大公營機構嘅高層，又話要查數檢討，認真高效率兼大動作。
不過，有線人偷偷話畀八方聽，其實曾司長早喺上星期一已經通知晒九大公營機構嘅頭頭，叫佢哋開會傾吓社會嘅反應；而老董前一排亦已經向九大公營機構頭頭私下打過招呼，叫佢哋識時務自動「瘦身」，所以有啲機構一早就做定手腳自減人工，以免日後俾人鬧。
老董同煲呔夾檔，本來想做番場好戲，誰知工團個李國強唔識趣，竟然早一日爆個調查出嚟，搶咗頭啖湯，老董身邊嘅謀臣惟有歎一句「謀事在人，成事在天」！


E-mail：[email protected]