莊思明同楊明手拖手睇樓，關係進展真係飛快，仲公開講到明，話想喺一、兩年內結婚。但係大台真係愛情搖籃嚟，要鬥熱戀程度，其實有好多對手。

黃翠如　蕭正楠
講輩份，呢對情侶喺14年開始認拍拖，之後呢對情侶檔就拍住上，出吓活動又一齊拍過劇。喺啱啱過咗嘅暑假就一齊去咗歐洲自駕遊，早前甚至傳話兩人準備好結婚，打算喺將軍澳置業o添。

黃心穎　馬國明
馬明一向係筍盤代表，勤力工作又冇乜感情緋聞，呢位好男仔最終就情定咗喺12年港姐亞軍黃心穎。兩人今年多次被影到行街拍拖睇戲，心穎仲花咗855萬入市做業主，出活動又話35歲前生BB，即係話，馬明如果想要個馬仔，就要等多7年喇。

何雁詩　鄭俊弘
今年4月被指拍拖，鄭俊弘被未婚妻鬧爆，結果兩人由唔認拍拖到公開喺機場認愛，只係一日內嘅事。鄭俊弘形象插水，遭公司雪藏，何雁詩就幫手解畫，兩人有把握時間進修。

陳芷尤　張振朗
等咗好多好多年，張振朗唔使再做「翻版黃宗澤」或者「翻版Cool魔」，終於正式上位。所以佢同新咪神34D陳芷尤嘅戀情就好低調，幾乎搵唔到冇任何合照。不過今年5月兩人同遊荷蘭，就俾人斷正，終於要認拍拖。

張寶兒　袁偉豪
新鮮熱辣嘅一對戀人。袁偉豪做咗「港姐殺手」，上年11月同岑杏賢分手，再到今年同張寶兒喺旅遊節目上撻着，兩人只係啱啱開始咗幾個月，仲喺蜜月期，佢就讚女友心地好。