八、九十年代香港電影，殭屍片題材當道，林正英孭飛嘅《殭屍先生》、《殭屍家族》同《一眉道人》等都極為經典，當年根本冇喪屍片立足之地，又或者冇製片人會諗過拍喪屍呢類題材。

數數手指，關於喪屍嘅港產片歷來少之又少，當中最多人講嘅會記得嘅，睇怕都係98年上映嘅《生化壽屍》。陳小春、李燦琛飾演嘅無敵同喪B，無論造型同角色性格都好搶，加埋視帝黎耀祥嗰份怕死狂恰老婆嘅演繹，套戲真係集有義氣、有縮骨、有喪屍、有劇情所有元素於一身。最正看點梗係湯盈盈啦，小背心真空上陣若隱若現，翻睇幾廿次《生化壽屍》都咁有味道，絕對係港產片中最具代表性嘅喪屍片！其後00年由馮德倫同李燦琛主演嘅《生化特警之喪屍任務》，製作或劇情上都同《生化壽屍》有好大距離，相信觀眾都冇乜印象喇。

其實喪屍片呢類題材，要喪屍嘅化妝特技逼真，喺大城市幾百隻咁跑嚟跑去咬人先夠震撼，要有大製作梗要有大資金射住，相信荷李活嗰邊先咁肯科水拍攝。大家睇吓踏入廿一世紀開始，《生化危機》系列一至六集都咁受歡迎，《魔間傳奇》同《地球末日戰》又係勁經典，同年代港產片為免比下去，根本冇人會拍喪屍題材。

好喇，港人等到頸都長，14年終於有番部港產喪屍片《屍城》上映，可惜被影評彈完全冇劇情，成套戲只係由Jessica C.狂拋警鐘胸，香港累積票房只收130萬元，慘淡收場。

不過，近年好彩有韓國嘅《屍殺列車》幫亞洲電影爭光，全球票房超過8,000萬美元，喪屍做得夠真，有劇情有溫情之餘，又可以探討人性問題，絕對係「喪屍界」嘅大突破！咦？下周香港又有套關於喪屍題材嘅《今晚打喪屍》上映喎！睇個陣容，有萬梓良出山帶住白只同張繼聰打喪屍，似乎幾有睇頭咁喎！一眾港產喪屍迷，你哋準備好未？

近廿年喪屍片香港累積票房（只列部份）
《生化壽屍》（98年）　$6,207,050
《生化特警之喪屍任務》（00年）　$2,736,695
《生化危機之變種生還者》（02年）　$6,635,783
《生化危機之殲滅生還者》（04年）　$7,418,785
《生化危機3：絕種生還者》（07年）　$10,777,544
《魔間傳奇》（07年）　$21,774,087
《生化危機3D：戰神再生》（10年） $18,378,506
《生化危機之滅絕真相》（12年） $20,071,079
《地球末日戰》（13年）　$42,602,911
《屍城》（14年）　$1,312,761
《生化危機：終極屍殺》（16年） $32,231,791
《屍殺列車》（16年）　$68,004,629