郭富城噚日出席喺尖沙嘴舉行嘅「慈善珍藏版星光閃爍水晶心思心誌郵票」簽名會，大會仲安排咗喺電影《殺人犯》飾演城城個仔嘅譚真一小朋友，做城城第一個fans。
聖誕節剛剛過去，問城城點過？城城話：「同一班朋友食飯，同抽禮物。」問佢係咪又打邊爐？佢就笑言：「唔係，朋友一早訂咗枱，食意大利餐。」咁城城又抽到乜嘢禮物呢？佢話抽到朱古力，咁啱之前緋聞女友熊黛琳（Lynn）俾人影到買朱古力喎，唔通城城抽到嘅就係阿Lynn份禮物，城城話：「我唔知喎，份禮物唔係佢嘅。」問佢餐飯阿Lynn有冇份，佢又買咗乜嘢禮物呢？城城就話私人嘢，唔會回應喎。

出肖像郵票興奮

城城對於自己嘅肖像可以成為郵票，覺得好開心，郵票嘅肖像代表唔同階段嘅佢，全部都好有紀念價值，而且仲係做慈善，佢之前話過希望幫聯合國兒童基金會「兒童之友」，一年之內籌到100萬，佢呢個目標已達成咗，城城話：「估唔到短短幾個月就籌到300萬，真係比預期中好，希望出年可以再做多啲活動，可以繼續幫助多啲小朋友。」
問城城新一年願望，佢表示希望身體健康，拍多啲好戲。咁愛情呢？城城話：「愛情我一向都隨緣o架啦。」講到佢已經有愛情都要隨緣，佢都只係答：「隨緣啦。」唔通阿Lynn唔係佢嘅緣份？