陳凱琳（Grace）同黎諾懿今日到九龍塘，出席動畫《反斗車王3》宣傳活動，活動上要兩人分享對車嘅睇法，Grace就話：「自己雖然有車牌，但係就鍾意坐車多過揸車，因為可以睇風景同用電話。」至於黎諾懿就話：「自從有咗小朋友之後，架車就愈換愈大，車速就越揸越慢。」

諾懿訪問時就話o依家全屋都係小朋友：「 好似兒童樂園咁，除咗自己個仔，仲有四個侄仔，o依家買得最多嘅就係玩具。」囝囝已經兩個月大，諾懿話o依家湊得好熟手：「o依家淨係憑佢嘅喊聲分得出肚餓、眼瞓定屙咗臭臭。」旁邊嘅Grace聽到都讚諾懿犀利，咁Grace又想唔想快啲做媽媽試吓湊小朋友？佢話：「聽到佢咁講都好羨慕，但自己唔識湊。」

噚晚網上瘋傳一條虐兒短片，兩人都話睇完覺得好痛心，諾懿仲話：「莫講話小朋友，就算對小動物都唔應該用暴力，無論任何情況下都唔應該郁手。」

同時諾懿又稱不主張體罸：「我諗個仔第時點曳都唔會曳得過我以前，小朋友都唔識，我會慢慢同佢講，好似我老婆教狗一樣，對我都係咁，不停『哦』足我兩個鐘，又唔俾瞓覺，後來學識由得佢講，唔好駁嘴，如果唔係有排『哦』。」

聽完諾懿老婆個方法後，Grace會唔會效法吓？佢似乎扮聽唔明咁笑笑口話：「我冇養狗喎，我知你講咩，我唔答之嘛。」