一年一度嘅港姐選舉又開始招募,無綫今日安排咗幾名歷屆港姐冠軍包括張嘉兒、朱晨麗、陳庭欣,同埋去年嘅三甲張名雅、黃心穎同朱千雪等,喺尖沙嘴出席《2013香港小姐選舉》本地招募造勢。都唔知係依家啲女仔唔襟捱定係噚晚唔夠瞓,今日出到嚟……一係面腫一係肥咗,加上換咗新髮型,望落去,同「靚」字有距離。
舊年無綫創新大搞一人一票投票,全城參與,結果變成全城最大碌笑柄。今年呢,未知,但招募女仔嘅條件就公佈咗,歡迎年齡介乎17歲到27歲嘅女仔參加,即係同往年一樣。初步預計入圍20人,分別喺8月進行準決賽,9月1日總決賽,仲會分組去8個地方拍外景。
至於海外佳麗,有指樂基兒個24歲妹妹Crystal好有興趣參加,據聞佢會以三藩巿海外佳麗身份參賽,但樂基兒就好反對。無綫非戲劇分部經理衞世輝話,海外招募啱啱完咗,暫時未聽到樂基兒妹妹Crystal參賽。
逢周五隨《蘋果日報》附送嘅時尚美容雜誌《add》第二期已出版;拎唔到書嘅朋友,可以上番《add》嘅官網 http://hk.add.nextmedia.com/睇番足本網上版,除咗有陳慧琳訪問,仲有好多時裝靚嘢睇!