近日有個後生仔掛住踢波，擺低隻42萬勞力士唔見咗，唔夠一日竟神奇地失而復得。而在馬圈，前冠軍騎師十三少韋達冇嗰位後生仔咁大意，但一樣咁好彩失而復得。

曾幾何時好撐韋達之「才」系馬，其馬主梁麟炳及梁冠華父子，自季初「天才」搏輸，跟手換羅理雅贏二級賽馬會盃後，從此全線同韋達冇晒交收。

事隔半年，韋達同「才」系馬再重逢，今晚（28日）快活谷夜馬，有第六場三班1650米「狀元才」作2017首次重新合作。平情而論，「狀元才」歷來一贏三位，全由十三少經手，近六仗換了其他騎師，結果前四名都冇，今次增程初跑1650米，隨時更合這匹後上馬，韋達交到功課的話，咁以後一切都好易傾啦！