蓋鳴暉主演保良局慈善粵劇《紅絲錯配》噚晚喺新光戲院舉行，保良局主席蔡李惠莉亦有份演出，佢兩女一子、新抱、孫仔孫女 全家總動員出動撐場，包括蔡加讚、汪圓圓 、蔡加怡同老公、蔡加敏帶同仔女以，仲有一班保良局主席總理齊齊化上粵劇裝踩台演出喜劇。

蓋鳴暉話今次曲目只演一場，同保良局合作已經二十五年，好多善長都好有實力，做慈善唔理多與少，希望參與支持，自己演出量同吸引力可以令粉絲入場睇幫助人，今次總理會獨立演出一個喜劇環節，等佢哋感受舞台，做戲一啲都唔簡單。總理主席有冇問演出意見？蓋鳴暉話：「我哋有交流，我有教佢哋行路，最緊要淡定，唔好太多花巧動作，舒服就ok ，相信觀眾唔太介懷佢哋演出，因為都係做善事。」

蔡加讚睇到媽咪化上粵劇裝覺得造型好靚好得意，佢平時唔會跟媽咪學戲，因為遺傳唔到媽咪歌喉 ，但媽咪喺屋企多數都會聽Opera女高音，又細聽到大，但睇媽咪做粵劇就係第一次，所以同太太汪圓圓都好期待 。蔡加讚自嘲唱歌冇天份，但做慈善絕對支持，只係唔想失禮保良局。平日會唔會唱歌冧太太呢？ 蔡加讚笑話：「我驚冧唔到太太，最必須嘅時候求婚有唱過。」汪圓圓話當時畀老公超過100分，但自此就好少聽老公唱歌。

精選娛聞，喺晒《娛果》
http://fb.com/appledailyent