【新增內容】

2018年樂壇第一張成績表、港台「第41屆十大中文金曲」頒獎典禮，今日假香港知專設計學院舉行，頒發的8個獎項包括「優秀流行歌手大獎」、「十大金曲獎」、「優秀流行國語歌曲獎」、「最有前途新人獎」、「最佳進步獎」、「CASH最佳創作歌手獎」、「最佳樂隊/組合獎」、「最佳中文唱片獎」，其餘大獎，包括最優秀男女歌手同全球華人至尊歌曲獎，將在明年1月3日舉行的音樂會公佈。

講到今年嘅賽果，其實唔算好驚喜，算係「皆大歡喜」型，暫時由陳奕迅同張敬軒平分春色各擸3獎，另外李幸倪（Gin Lee）、江海迦（AGA）、陳柏宇、謝安琪及周柏豪各得2獎，而容祖兒則暫時只得「優秀流行歌手大獎」。不過，今日陳奕迅、鄧紫棋、李榮浩、容祖兒都缺席攞獎，而菊梓喬坐足幾粒鐘都捧蛋。

軒仔先拔頭籌擸3獎，佢表示：「好開心，今年第一個頒獎禮已經有交代。」問到有冇信心頒獎禮攞大滿貫做大贏家？軒仔笑言：「有就自然開心，冇就隨緣，每個傳媒評選機制都唔同。」之前軒仔在網絡平台頒獎禮贏咗姜濤：「唔好咁講，搞到兩邊歌迷唔開心，最唔想見到，唔明白點解今年將我同姜濤拉埋嚟講，之前係鬥人氣，我一把年紀，攞到又好，輸咗都雖敗猶榮，自己做咗咁多年。」

此外，講到師妹周勵淇（Niki）宣佈婚訊，軒仔表示：「我啱啱見到，唔係一早知，戥佢開心，佢啱啱加盟公司，又搵到好老公，人生嘅兩方面都得到全面照料。」軒仔話唔識Niki老公，大家冇見過面。對於經理人霍汶希打趣話想結婚就加盟英皇，軒仔笑說：「係呀，旺丁又旺財，我就係旺財嗰邊，自己明年開新餐廳。」

「第41屆十大中文金曲」獎項名單
優秀流行歌手大獎 (排名不分先後)
謝安琪／AGA江海迦／Gin Lee 李幸倪／JW 王灝兒／容祖兒／周柏豪／張敬軒／陳奕迅／陳柏宇／衛蘭／鄭欣宜
十大金曲獎：
1.《缺》張敬軒
2.《漸漸》陳奕迅
3.《男人背後》 周柏豪
4.《認真如初》陳柏宇
5.《橙海》Supper Moment
5.《很堅強》Gin Lee 李幸倪
6.《小問題》AGA江海迦
7.《停半分鐘聽一闋歌》許廷鏗
7.《一個女人和浴室》謝安琪
8.《假使世界原來不像你預期》方皓玟
9.《孝順》吳業坤
10.《到此一遊》胡鴻鈞

優秀流行國語歌曲獎：
金獎：《之外》陳奕迅
銀獎：《倒數》G.E.M.鄧紫棋
銅獎：《張家明和婉君》李榮浩
最有前途新人獎：
金獎：曾樂彤
銀獎：戴祖儀
銅獎：譚杏藍
優異獎：洪嘉豪、李皓軒、黃妍
最佳進步獎
金獎：梁劍峰
銀獎：吳浩康
銅獎：葉巧琳
CASH最佳創作歌手獎
林奕匡
最佳樂隊組合
金獎：Supper Moment
銀獎：Dear Jane
銅獎：Robynn & Kendy

最佳中文唱片獎
男歌手：張敬軒《HINSIDEOUT演唱會》
女歌手：楊千嬅《三二一GO LIVE》
組合：C AllStar《生於C AIIStar演唱會》
金針獎：達明一派

精選娛聞，喺晒《娛果》
http://fb.com/appledailyent