英超榜首曼聯周中歐聯大勝，但就傷咗中場保羅普巴，一般預計西班牙中場安達靴里拉會頂上正選位置；不過英國傳媒就爆料，靴里拉其實上季歐霸盃期間，已經有疑似無間道事件，激嬲咗摩連奴，今季都安排佢打後備入主，所以普巴受傷靴里拉都未必解凍。

曼聯上季歐霸盃準決賽就面對切爾達，原來靴里拉嘅爸爸就踢過兼做過切爾達總監，所以靴里拉同切爾達職球員關係都唔錯；當時次回合曼聯主場，靴里拉就帶咗一名切爾達職員入卡寧頓練習基地參觀，有冇洩露軍事機密就唔知，但就搞到摩連奴好嬲，之後提咗靴里拉入房照肺添。今季紅魔鬼有尼曼查馬迪加盟後，靴里拉更加由中場當然正選，變咗邊緣人，所以靴里拉要把握呢排普巴受傷爭取表現，證明自己唔係無間道先得嘞。