當年今日

健康blog:常轉換食油益處多

蘋果日報 2008/06/08 00:00


好多家庭都鍾意固定口味用一種食油,𠵱家市面上食油林林總總,好多都話有益健康,其實經常轉換唔同類型嘅食油,可以吸收到唔同營養,例如維他命E同D、不飽和脂肪酸、卵磷脂等,比較單純食用一種油好處多好多。
花生油防血管硬化
家庭主婦對點揀食油一定有好多疑問,醫神就搜集咗啲食油營養價值嘅資料同大家分享。其中好多家庭都用嘅粟米油,優點係容易消化,吸收率可以高達97%,一般粟米油的不飽和脂肪酸含量大約有80%,入面更包含咗一種身體唔識得合成嘅脂肪酸「亞油酸」,加上豐富嘅維他命E,特別適合消化力差嘅人同長者食用。
屋企有人膽固醇超標,最好就係揀橄欖油,因為橄欖油嘅不飽和脂肪酸係所有食油中最高,具有降低壞膽固醇(低密度膽固醇),提升好膽固醇(高密度膽固醇)功效,仲可以預防心臟同腦血管疾病,兼減低膽囊炎同膽結石嘅風險。
孕婦就可以揀近排好受歡迎嘅葵花籽油,因為葵花籽油嘅亞油酸同亞麻酸,可以喺身體合成促進腦部發育嘅DHA,有利胎兒的腦部發展,葵花籽油仲有軟化血管、延緩衰老、預防眼亁同皮膚亁燥等等嘅功效。不過,要注意嘅係葵花籽油比較容易變壞,一樽油唔好食得太耐。
至於傳統嘅花生油其實都好有營養價值,尤其含有一種天然多酚類物質,可以預防血管硬化,兼降低膽固醇水平。其實唔同類型嘅食油營養價值都有分別,不妨三、五個月轉換一下口味。
blog主:醫神