【2017大事回顧】
白恤衫，因你變耀眼；白襪仔，都因為香港第一先生林兆波，變得格外迷人。呢位向來低調嘅學者，冇因為太太一登龍門成為禮賓府新主人而改變既有嘅lifestyle：拒絕任何公職，樂做背後嘅小男人，依舊恤衫西褲走天涯，貫徹樸實風格。就連7.1宣誓呢個大日子，林兆波都冇特別打扮，繼續以純情小白襪配黑鞋（圖），估唔到「無招勝有招」，旋即成為當日焦點。
查實八方都問過林兆波，點解7.1當日「白襪一疏」？佢笑住回應話得啖笑，仲自爆不為人知小秘密：「其實我唔鍾意着襪！」
而佢嘅坦率性格，亦從佢鬧林鄭唔瞓覺可見一斑，林鄭曾經自爆俾老公埋怨工時長：「佢有幾晚話我黐線㗎，話『兩點幾喇喂老婆』！」，似乎好關注好打得嘅老婆究竟捱唔捱得，而且仲俾讀者發現睇戲時主動調位，以便他人一家人排排坐，可見都係暖男一名，難怪白襪仔喺今年都成為純樸仙氣男嘅代名詞咯！