吳雨霏（Kary）今晚現身中環，參與時裝品牌舉行嘅大型街頭時裝派對。問到佢平時有冇着性感睡衣o氹老公？Kary話：「都有嘅，係夫婦間嘅情趣，我鍾意喱士款式。」佢仲話會搞啲浪漫氣氛，例如點吓蠟燭咁：「自己會佈置吓，令屋企浪漫啲，因為覺得婚後大家都需要一啲熱情，希望令婚姻多啲情趣。」

Kary又提到老公都會俾番啲情趣自己嘅，記者問係咪着大象內褲嚟o氹老婆？Kary即笑言：「哎呀，我唔成日講佢啲嘢喇，陣間又話我爆晒佢啲嘢出嚟！」轉個頭Kary就讚老公平時對自己好sweet，佢話：「好似我出trip，佢經常都會俾surprise我，例如接我機，作為老公佢都好努力。」

問到老公出邊招最冧到佢？Kary話：「其實我個人好易o氹，總之俾多啲時間陪我就OK，好似佢有時去第二度搭長途機，佢都會盡量返嚟陪我。」至於造人方面，Kary話暫時要擱置計劃：「o依家唔諗住喇，因為簽咗演唱會，要做到下年1、2月，不過我哋都唔係咁急嘅，等做完演唱會先算啦！」