內地電子錢包大行其道，居民生活離不開支付寶、微信支付等付款程式。為了方便「賺人仔」，港鐵去年底已率先宣佈在羅湖和落馬洲站推出支援內地支付寶的售票機。近日有網民就發現在尖沙嘴港鐵站都出現支付寶售票機的蹤影。有人慨嘆港鐵為賺錢向內地靠攏，擔心現時港人普遍使用的八達通會步入末路，但由於該部售票機暫時只能購買單程車票，有網民相信內地旅客來港始終會購買八達通，「（車票）平過正價喎...你自己會點揀？」

根據港鐵網站資料，支付寶購票機試驗計劃今年上半年將擴展至尖沙嘴、尖東及銅鑼灣3個內地旅客必到的旅遊熱點，除了支援內地支付寶，亦支援支付寶香港及微信支付，乘客只須掃描手機上的QR code即可付款，價格亦與用現金購買單程車票一樣，並以港元買賣。有香港網民認為使用內地電子錢包是「大勢所趨」，取笑港鐵「賺錢要緊，整閘都要錢啦」，但有人就質疑內地電子系統的可靠信，「只顧討好大陸客而嚴重歧視本地人」。

【網民咁講】
Steven WL Ng：世上有好多款電子支付系統，點解係都要揀中共支持的？
Cecilia Lee：支付寶、wechat頂級垃圾！咁鍾意用，返大陸用死佢啦。
Peter Wong：要收梗係收有幾億人用緊的支付工具啦，支付寶、wechat咪就係囉，有咩問題？
Yeung Ching Roy：MTR同我公司一擔擔，只顧討好大陸客而嚴重歧視本地人。
Jason Luk：咁講就有藉口轉晒閘口唔用八達通。
smine Wong：賺錢要緊，整閘都要錢啦。