除剩粉紅底底 阿仙奴鋒將跳江南style
淺野拓磨阿仙奴
除剩粉紅色底褲,喺鏡頭面前震胸肌,仲喺度跳舞!究竟邊位阿仙奴前鋒咁出位?唔通係鍾意帶女上房嘅傾偈嘅基奧特,定係韋大帝?原來係嚟自日本嘅淺野拓磨!
唔係睇到呢單嘢,都醒唔起阿仙奴有個咁嘅人。淺野拓磨舊年夏天由廣島三箭加盟兵工廠,轉會費550萬鎊,但22歲嘅淺野申請唔到工作證,冇得踢英超,所以被外借去德乙嘅史特加,踢咗半季都係得兩個入波,表現麻麻。
既然場內表現吸引唔到球迷注意,咁就不如喺場外浮誇一吓。喺網上嘅片段見到,淺野好似沖完涼出嚟咁,着住拖鞋,身上剩係得條粉紅底底,之後聞聲起舞,震晒肌咁,喺度跳江南style,唔知阿仙奴啲女球迷受唔受呢?