早兩日泛民開集思會嘅時候，有事遲到嘅公民黨前黨員湯家驊，一入到會議室就俾人趕番出嚟，仲拋低一句「咁即係唔當我係泛民啦」。湯狀噚日再喺facebook大吐苦水，詳細講述佢點樣俾公民黨黨魁梁家傑拍枱趕離場，仲話傑哥情緒失控早有前科！傑哥就話唔想回應，免得好似小朋友嗌交喎，好多泛民中人見到咁都冇眼睇，希望盡快息事寧人。
湯狀噚日喺fb貼千字文為自己申冤，否認外面成日話佢想拉泛民入智庫民主思路，等自己可以做泛民龍頭，跟住就話當日佢被趕離場、民主黨何俊仁請番佢入去後，佢一入到去就問傑哥仲當唔當佢係泛民飯盒會成員，點知傑哥忽然青筋暴現，滿面通紅，不斷拍枱呼喝，鬧湯狀再係咁樣就即刻停會，等湯狀冇得講，兼且要湯狀即刻走。之後其他泛民出聲，個會先開得落去。不過亦有與會泛民同八方講，其實湯狀當日都有掟iPad，兩個都好躁底。

湯狀仲話傑哥突然情緒失控早有前科，呢兩年更日漸頻密，甚至不斷有記者投訴俾傑哥喝罵。最後就對傑哥向傳媒致歉感啼笑皆非，質疑傑哥係有心自我檢討定係關心形象多啲。
湯狀咁勞氣，八方梗要問問傑哥件事係點，傑哥話當日嘅事喺係10幾位泛民議員眾目睽睽下發生，而佢就唔想好似小朋友嗌交咁去回應。至於會唔會約湯狀食番餐飯握手言和呢，傑哥就話大家識咗幾十年，冇需要喇。好多泛民議員都知湯狀係性情中人，傑哥就有嗰句講嗰句，希望時間可以沖淡件事，唔好為小事傷感情喇！

李八方
mailto:[email protected]