當年今日
關於我們

【老公曾被指爛蒲】默認婚姻亮過紅燈 賢妻鍾淑慧:一家人唔計較

蘋果日報 2016/11/06 00:02

爛蒲婚姻亮紅燈鍾淑慧吳岱融

87年選美出身嘅鍾淑慧,雖然選完美之後走咗去做藝員,但係發展麻麻,於是乎走咗去拍三級片,喺95年11月仲同對吳岱融結婚,生埋個仔,兩公婆之後去咗去大陸拍戲。
不過喺90年代嗰陣,電影業因為盜版好嚴重而進入咗黑暗期,唔少藝人都冇工開,吳岱融當年亦喺呢個等待嘅行列,一個人生活唔如意,難免會借酒澆愁,所以當年有傳吳岱融喪蒲喪玩又成日生事,好彩得老婆鍾淑慧撐起頭家,喺大陸登台密密唱,之不過冇耐傳出佢哋婚姻出現問題,鍾淑慧帶咗阿仔去廣州定居。
唔知係咪人大咗自然生性,近幾年佢哋喺微博多咗旅行度假相,仲有好多家庭照,睇落都好sweet喎!
噚日鍾淑慧接受《蘋果》訪問,講到當年有傳佢哋婚姻出現問題,鍾淑慧言談間默認呢件事,佢話:「我相信一對夫妻邊度會冇磨擦,喺婚姻過程梗會有啲,我哋結咗婚都20幾年,一定會有磨擦同唔開心,過咗去就冇嘢,唔需要再提。」
但係當年有指吳岱融事業失意加上愛蒲,鍾淑慧獨力撐起頭家?佢話: 「0依家呢個年代都冇話邊個撐起頭家,亦都冇話男主外、女主內,甚至係男主內、女主外都冇乜所謂,大家一家人都唔會計較呢啲嘢,邊個OK咪邊個上囉,真係冇乜所謂。呢啲嘢其實好似打波,邊個體力OK,咪打住上半場先,邊個想抖嘅,咪打住下半場先囉,甚至乎大家都OK嘅,咪打住雙打先囉,一齊去拼博,唔可以獨力去做。」佢仲話:「我0依家日日都喺度暢泳、行街同休息,佢日日都到好辛苦,病住都要開工,呢啲又點計呢? 」