賭馬有趣又或困難地方，就是很多時與預計不符又或不跟歷史走，就像剛周三（12日）戰友要賭「上旺財上」同「怪獸都市」，所持理由是他事前畫走位圖，覺得兩匹馬都無馬鬥搶放頭着數，結果是怎樣？

「怪獸都市」一場最終由「極速駿馬」頭800米開47秒樓上慢放帶到，但「怪獸都市」並沒有把握這優勢，一起步便留。

至於「上旺財上」看往績是一匹開24秒左右拉士的死步頭馬，其實無馬鬥搶慢放反而蝕底，勢估唔到今次「大天龍」盡搶，幫了「上旺財上」一把，不過後駒又做24秒拉士，結果都係贏唔到。

睇最近五季數據，文家良是其中一個冷門入圍最少馬房，然而最近破數據，繼上星期三爆完「小島怡情」後，事隔一周再來一隻「勁勇威龍」，這是否意味着文廐馬悉數谷起，進度更勝馬房預期？

周日（16日）賽事，第八場三班1200米，「艮志騰雲」十月初於今戰三班田草1200米排大外檔放入一席，僅敗於實力極強的「好運多贏」，最近兩次表現下滑，包括前仗配潘頓排外檔跑谷草1200米無盡搶遊馬河。

上次「艮志騰雲」則交韋達跑嫌長的1400米還要屬二班賽，今勻用黃俊減磅，回歸三班賽兼縮程跑1200米，立心從外檔切入搶放，可望延續文廐近期旺勢。

至於廐侶第六場四班1600米，「開懷大少」前仗田草1600米只輸影相，剛戰同程起步有意外留後兼搶口，遇上超慢步速用武無地，近期文廐馬谷起，今次只要取位暢順，亦可回復真面目。