眾人眼中品學兼優嘅10歲女童紫珺，無端端着住校服過關去深圳玩失蹤，流落20小時後自稱「貪玩」，箇中原因及經歷，搵秋官拍集《謎》應該會吸引唔少人睇。
網友faistock喺《香港討論區》講笑咁話：「個細路女原來偷上大陸炒A股，因佢知讀書無前途，想學人炒股票，諗住開戶好簡單，點知未夠年齡同唔係大陸人，原來開唔到戶，所以好失望咁四圍遊。」網友沈刑加多兩錢想像力補充話：「原來過關時，佢問個師奶買邊隻股好！」

Benny1218認為佢唔食嘢，原來係想留多幾個錢炒股；唔瞓覺，係諗緊買邊隻股好。網友siuhu、piccs和cwt2001不約而同話，如果係真，呢個細路女認真有前途，係「醒目女」。
Szyulian就話：「一本萬利，大陸1000蚊已經開到股票戶口。」ttl005癲埋一份插口：「佢知道A股升幅高過H股好多，所以上去炒A股會較易做到股神！」FF89接着話：「1K變1000K，即係百萬股神……童！」
FLELF就唔係好同意網友嘅猜度，獨排眾議話：「其實，個女仔可能係高人，上去畀料阿爺叫佢加稅。」