近期有個怪現象，2017年首個交易日，氣氛仍然非常頹，突然青姐發4萬點偉論，跟住曾教授再預言港股可能升到你唔信，市場突然間由萬念俱灰，一兩日間變到希望在人間，變臉快到估唔到。

日本漫畫Liar game有一段情節，主角同一眾對手玩「多數服從少數」遊戲，參與者設法要令自己成為遊戲嘅少數贏家，不惜講大話、諗盡辦法令其他人成為多數者，等自己能夠贏。芸芸股市參與者裡面，喺imperfect information之下，去估多數者企喺邊一邊，然後令自己成為少數，講就容易，完美做到幾乎冇可能。只不過，當股市由低位開始升，好友原本係少數者，慢慢就會成為多數者，從投資心理方面，要學懂如何掌握接火捧嘅時間，不妨Search返隔籬鄰舍八十後投機客喺本報以《賭徒在左，炒家在右》為題嘅好文。

至於今次，好友由少數變成多數嘅速度，會比想像中快，所以港股升嘅速度亦會比想像中急，短線升浪會比想像中完得更早。維持原先預期，23,000點係嚿年8月延伸到而家嘅平台阻力位，因此升近23,000點，寧願減倉去觀察指數有冇能力突破，見到23,000點突破再企得穩，先再建倉，策略改為短炒二三線股。太航（2343）噚日醞釀旗形突破，少少成交已推得郁第一棍，現跟進仲未遲。

晉佳

掌握財經生活資訊，即Like「蘋果ATM」fb專頁啦！
http://fb.com/appledailyatm